Pólska listahátíðin Vor / Wiosna fór fram í þriðja sinn dagana 21.-25.apríl síðastliðinn. Þema hátíðarinnar var hljóð-og myndlist / audio-visuals. Að þesu sinni breyttum við áherslum hátíðarinnar og meira var lagt upp úr vinnustofum og námskeiðum tengdum þemanu. Boðið var upp á námskeið í hefðbundinni tækni slavneskra söngva, tækni sem að oft er nefnd “hvít rödd” eða “opin rödd”. Leiðbeinandi á því námskeiði var Anna Sitko þjóðfræðingur og þjóðlagasöngkona frá Krakow, Póllandi. Námskeiðið var einstaklega vel heppnað og mikil ánægja með það á meðal þáttakenda. Einnig var boðið upp á vinnustofu í stafrænni tónlist þar sem að Benia Beniowska DJ og hljóðlistamaður leiddi þáttakendur í gegnum heima rafrænnar tónlistar, afrakstur námkeiðisins var síðan fluttur á hápunkti hátíðarinnar. Síðast en ekki síst leiddi Adam Switala, aðjúnkt við HÍ og tónlistarmaður, vinnustofu fyrir börn og foreldra í lifandi tónslistarsköpun þar sem að hljóðheimar hinna ýmsu hljóðafæra voru kannaðir og reyndir. Tilraunkennd vinnustofa sem vakti mikla lukku hjá yngstu kynslóðinni.

Þjóðleikhúsið frumsýndi nýverið, í samstarfi við Frystiklefann á Rifi, leikritið Prinsinn eftir Maríu Reyndal og Kára Viðarsson. Leikritið er byggt á sönnum atburðum en það fjallar um reynslu Kára sem horfðist í augu við það sautján ára gamall að eiga von á barni. 

Í verkinu kynnumst við manni á fertugsaldri sem bíður í ofvæni eftir því að barn hans komi í heiminn. Eftirvænting og kvíði takast á í huga hans, og atburðir sem áttu sér stað tveimur áratugum fyrr fara að sækja á hann: 17 ára menntaskólastrákur er staddur á Laugaveginum ásamt vini sínum þegar síminn hringir. Sæta stelpan sem vinnur á Prinsinum er í símanum. „Ég er ólétt. Þú ert að verða pabbi.“ Hvernig getur maður orðið pabbi sautján ára, og mamman bara sextán? Er framtíðin í rúst?

Hjartnæmt og fyndið nýtt íslenskt leikrit, sem talar beint til okkar.

Alls verður Prinsinn sýndur á sjö stöðum víðs vegar um landið áður en sýningar hefjast í Þjóðleikhúsinu í haust. Sýningin verður í Valaskjálf þann 19. maí. Miðasala er í fullum gangi á leikhusid.is.

MMF tók þátt í að setja upp sýninguna Misplaced Gaze í Menntaskólanum á Egilsstöðum síðastliðinn fimmtudag. Sýningin er samspil ljósmynda og ljóða eftir listamenninia Juanjo Ivaldi Zaldívar og Tess Rivarola. Listamennirnir vinna verk sín með melankólískum blæ, sem markast af bakrunni þeirra. Þau koma bæði frá suðlægum slóðum (Paragvæ) en eru í dag búsett á Seyðisfirði og upplifa þá tilfinningu að vera einangruð fjarri hávaða stórborga og mannmergðar. Í staðin upplifa þau nándina við náttúruna allt í kringum sig og þær breytingar sem eiga sér stað á henni. Fyrir sýningaropnunina buðu Juanjo og Tessa upp á listasmiðju í samvinnu við listnámsbraut ME þar sem lögð var áhersla á upplifun þátttakenda af áhrifum loftslagsbreytinga á náttúruna. Afrakstur smiðjunnar voru fjölbreyttar klippimyndir og voru þær til sýnis á opnuninni. 

Misplaced Gaze er farandsýning, opnar í Þórsmörk Neskaupsstað 25. mars og svo í Herðubreið á Seyðisfirði 31. mars og því þarf enginn að missa af þessari frábæru sýningu. 

Undanfarna mánuði hefur mikið gengið á í Sláturhúsinu. Þar eru framkvæmdir í fullum gangi og miðar vel áfram. Framkvæmdir utanhúss eru á síðustu metrunum, en skipt var um þak á öllu húsinu og klárað að klæða það að utan. Einnig var bætt við gluggum og hurðum eftir þörfum.

Innan dyra er ennþá verið að vinna í að brjóta niður það sem þarf til að hægt sé að byggja upp aftur. Miklar breytingar verða gerðar innandyra. Á efri hæð er verið að taka frystiklefann í gegn og verður hann að 240 fermetra fullbúnu blackbox sviðslistarými. Fyrir framan hann verður sýningarsalur, eins og var áður, en búið að brjóta niður alla milliveggi og kompur og salurinn orðinn eitt rými. Danssalur með sérstöku dansgólfi verður á sama stað og áður, en inn af honum bætist við salernis- og sturtuaðstaða fyrir þá sem eru að vinna í húsinu. Þar sem áður var vinnustofa listamanna verður kaffistofa/eldhúsaðstaða og tæknirými.

Á neðri hæð hússins kemur nýr stigi upp á efri hæð, þar verður bætt við salernum og opnað verður úr salnum út í suðurátt. Þar verður rými sem nýtist ýmist fyrir vinnustofur, námskeið eða sýningar. Vegahúsið, ungmennahús, verður áfram á sínum stað en þar verður bætt við gluggum og inngangurinn gerður aðgengilegri. Frystiklefinn á neðri hæðinni hefur líka verið tekinn í gegn og mun hýsa Ormsstofu.

Arkitekt verkefnisins er Anna María Þórhallsdóttir hjá Sniddu arkitektum, tæknilegar útfærslur eru í höndum verkfræðistofunnar Eflu og byggingastjóri er Jónas Hafþór Jónsson frá Verkráð. 

Áætlað er að framkvæmdum ljúki 1. júní og því verður sumarsýning Sláturhússins á sínum stað og eðlileg starfsemi í húsinu í framhaldi af því.